កម្ពុជាជាទីផ្សារថ្មីនៃបច្ចេកវិទ្យាទំនើប
ដោយសារមើលឃើញពីសក្ដានុពល និងភាពរីកចម្រើនឥតឈប់ឈរនៃសេដ្ឋកិច្ចរបស់ប្រទេសកម្ពុជា ដែលបានមកពីការបោះទុនវិនិយោគរបស់បណ្ដាក្រុមហ៊ុនធំៗនៅប៉ុន្មាន ឆ្នាំចុងក្រោយនេះ ការតាំងពិព័រណ៍ឧស្សាហកម្មគ្រឿងយន្តកម្ពុជាអន្តរជាតិក្នុងឆ្នាំនេះ ជាសញ្ញាបង្ហាញឲ្យឃើញថា ប្រទេសកម្ពុជាបច្ចុប្បន្ន កំពុងត្រូវការគ្រឿងយន្តឧស្សាហកម្មទំនើបៗដើម្បីបម្រើដល់ឧស្សាហកម្ម សេដ្ឋកិច្ចរបស់ខ្លួននាពេលអនាគត។
អ្នកស្រី Tracy Yen តំណាងផ្នែកលក់របស់ក្រុមហ៊ុន Guan Yu Machinery Factory ជាក្រុមហ៊ុនជំនាញផលិតគ្រឿងឧបករណ៍បម្រើផ្នែកផលិតចំណីអាហារមកពី តៃវ៉ាន់ បានបង្ហាញក្ដីរីករាយសម្រាប់វត្តមានលើកដំបូង ក្នុងការតាំងពិព័រណ៍គ្រឿងយន្តនៅឆ្នាំនេះ។អ្នកស្រីថ្លែងឲ្យដឹងថា កម្ពុជាបានក្លាយជាទីផ្សារថ្មីប្រកបដោយសក្ដានុពលសម្រាប់ការ វិនិយោគពីបរទេស។ ដូច្នេះតម្រូវការគ្រឿងបច្ចេកវិទ្យាទំនើបជារឿងចាំបាច់ ហើយការដាក់បង្ហាញលើកនេះក្រៅពីណែនាំឲ្យបានស្គាល់ និងក៏ដើម្បីស្វែងរកដៃគូជំនួញក្នុងការនាំផលិតផលនេះមកលក់លើទី ផ្សារកម្ពុជានាពេលអនាគតផងដែរ។
ឆ្លៀតក្នុងឱកាសនោះដែរកញ្ញា ហេង អ្នកផ្ដល់ព័ត៌មាននៅក្រុមហ៊ុន Gian Kwang ដែលជាក្រុមហ៊ុនឯកទេសខាងផលិតគ្រឿងឧបករណ៍កសិកម្ម និយាយទាំងមានជំនឿសម្រាប់ការតាំងពិព័រណ៍នេះថា នឹងទទួលបានការគាំទ្រច្រើន ជាពិសេសពីបណ្ដាក្រុមហ៊ុនវិនិយោគខាងកសិកម្ម។
កញ្ញាបានបញ្ជាក់ថា ការវិនិយោគខាងកសិកម្មនៅកម្ពុជាកំពុងមានសន្ទុះរីកចម្រើនយ៉ាង ខ្លាំង ហើយគ្រឿងឧបករណ៍កសិកម្មទំនើបៗទាន់សម័យ នឹងធ្វើឲ្យដំណើរការការងារមានភាពងាយស្រួល ឆាប់រហ័ស និងសន្សំថវិកា។
ថ្លែងក្នុងឱកាសបើកពិធីសម្ពោធតាំងពិព័រណ៍ឧស្សាហកម្មគ្រឿងយន្ត កម្ពុជាអន្តរជាតិ កាលពីព្រឹកម្សិលមិញនេះ លោក ម៉ៅ ធូរ៉ា រដ្ឋលេខាធិការក្រសួងពាណិជ្ជកម្មបានឲ្យដឹងថា ខ្សែសង្វាក់ផលិតកម្មតាមសហគ្រាសនៅកម្ពុជា មិនទាន់អាចប្រកួតប្រជែងជាមួយបណ្ដាសហគ្រាសនៅប្រទេសមួយចំនួនក្នុង តំបន់បាននៅឡើយនោះទេ។ “…សហគ្រាសស្រុកយើងនៅប្រើប្រាស់គ្រឿងម៉ាស៊ីនចាស់ៗ ហួសសម័យកាល ជាហេតុធ្វើឲ្យការផលិតបានតិចមិនអាចបំពេញតាមតម្រូវការទីផ្សារ បាននៅឡើយ”។ ដូច្នេះការតាំងពិព័រណ៍នេះជាការបើកផ្លូវសម្រាប់ពាណិជ្ជករក្នុង ស្រុក និងក្រៅស្រុកចាប់ដៃគ្នាសហការពង្រីកមុខជំនួញ តាមរយៈការប្រើប្រាស់នូវបច្ចេកវិទ្យាទំនើបៗទាន់សម័យដើម្បីបង្កើន ផលិតកម្មរបស់ខ្លួននាពេលអនាគត។
ការតាំងពិព័រណ៍ឧស្សាហកម្មគ្រឿងម៉ាស៊ីន ឧស្សាហកម្មកាត់ដេរ និងវាយនភណ្ឌកម្ពុជា អន្តរជាតិឆ្នាំ២០១១ នេះរៀបចំឡើងដោយសមាគមកាត់ដេរកម្ពុជា សហការជាមួយក្រុមហ៊ុន VINEXAD នៃក្រសួងឧស្សាហកម្ម និងពាណិជ្ជកម្មវៀតណាម រួមជាមួយក្រុមហ៊ុន Yorkers Trade& Marketing Service Hong Kong រយៈពេល ៤ ថ្ងៃ ពីថ្ងៃ ២៥- ២៨ សីហានៅមជ្ឈមណ្ឌលសន្និបាត និងពិព័រណ៍កោះពេជ្រ។
តើនៅទីនោះមានតាំងបង្ហាញ អ្វីខ្លះទៅ?
HPថាមិនឈប់លក់កុំព្យូទ័រទេ!
លោក Paul Hunter ប្រធានផ្នែក Personal Systems Groupin របស់ HP បានចេញផ្សាយនៅក្នុងបទសន្ទរកថាពាក់ព័ន្ធនឹងការចេញផ្សាយលើកមុន ថាខ្លួនចង់ចាកចេញពីមុខជំនួញកុំព្យូទ័រ និងនិយាយថាខ្លួននៅតែបន្តសកម្មភាពពាណិជ្ជកម្មនៅចក្រភពអង់គ្លេស ដូចធម្មតា។បទសន្ទរកថាមួយត្រូវបានសរសេរបកស្រាយពីយុទ្ធសាស្ត្រថ្មីរបស់លោក Leo Apotheker ប្រធានក្រុមហ៊ុន HP ដោយមិនខ្លឹមសារថា មុខជំនួញរបស់ HP នឹងត្រូវបំបែកជាពីរ គឺផ្នែកកម្មវិធី និងផ្នែកផ្នែករឹង ឬកុំព្យូទ័រ។ លោក Apotheker ពន្យល់ថា HP មិនដែលថាចង់ឈប់ពីមុខជំនួញកុំព្យូទ័រនោះទេ ហើយពេលនេះក្រុមហ៊ុនកំពុងពិចារណាលើជម្រើសបី បំបែក លក់ ឬទុកនៅដដែល។ មិនថាជម្រើសមួយណាទេ HP នៅតែបន្តគាំទ្រ និងបង្កើតបច្ចេកវិទ្យាឲ្យកាន់តែល្អដដែល។ លោកបន្តថា ទោះបីលក់ក៏ដោយ អតិថិជននៅតែអាចទទួលបាននូវសេវាកម្មដ៏ល្អដដែល។
នៅថ្ងៃខាងមុខ HP នឹងត្រូវដើរតាមផ្លូវតែមួយប៉ុណ្ណោះ ប៉ុន្តែមិនថាកុំព្យូទ័រ ឬផលិតផល WebOS ក្រុមហ៊ុននៅតែផ្ដល់ទំនុកចិត្តដល់អតិថិជនដដែល។ ចំពោះអ្នកដែលមាន WebOS ប្រើហើយ និងគ្រោងប្រើទៅថ្ងៃអនាគត ក្រុមហ៊ុននៅតែផ្តល់សេវាកម្មធានាដដែល ដោយសង្ឃឹមថាអតិថិជននឹងអាចទទួលបានបទពិសោធន៍ថ្មី ទោះត្រូវបញ្ចុះតម្លៃខ្លះក៏ដោយ។
